​ដោយមិនចង់បន្តនៅអង្គុយចាំយូរ ខ្ញុំផ្តេកខ្លួនបម្រុងនឹងដេកទៅវិញ ។ ប៉ុន្តែ មិនទាន់នឹងប្រះខ្នងដល់កន្ទេលផង ស្រាប់តែឮសម្លេងបុរសម្នាក់ស្រែកហៅខ្ញុំម្ដងទៀត ឱ្យទៅជួយសម្រាលកូនឱ្យស្រ្តីម្នាក់នៅឯចុងភូមិ ។​ សម្លេងនេះឮធ្ងន់ៗច្បាស់ៗនឹងត្រចៀក ខ្ញុំក៏ប្រញាប់ប្រញាល់បើកទ្វារមើលពីលើផ្ទះទៅឃើញមានមនុស្សប្រុសស្រមោលខ្មៅស្ទុងៗពីរនាក់ឈរនៅខាងក្រៅរបង ។ យល់ច្បាស់ថាអ្នកភូមិមករកហើយទើបខ្ញុំទាញប្រដាប់ប្រដាឆ្មប និងស្មុកម្លូរយួរចុះពីលើផ្ទះ ហើយក៏ដើរតាមបុរសពីរនាក់នោះសំដៅតម្រង់ទៅផ្ទះអ្នកឆ្លងទន្លេ ។

​មកដល់មាត់ច្រកចូលផ្ទះ ឃើញមានតែពន្លឺចង្កៀងប្រេងកាតមួយប៉ុណ្ណោះ ដែលកំពុងសាចជះពន្លឺផ្លុងៗចងព្យួរនៅសសរកន្លោង ។ គ្រាន់តែខ្ញុំឡើងទៅដល់លើផ្ទះស្រ្តីឆ្លងទន្លេនោះភ្លាម ដូចមានអារម្មណ៍ថាព្រឺក្បាល ព្រឺរោមខ្ញាកៗ ហាក់បីដូចជាមានព្រលឹងអ្វីកំពុងតែសណ្ឋិតនៅក្នុងផ្ទះនោះយ៉ាងអ៊ីចឹង ។ រីឯស្រ្តីបម្រុងនឹងឆ្លងទន្លេនោះ ដៀងកន្ទុយភ្នែកសម្លក់មើលមកខ្ញុំគួរឱ្យចម្លែកក្នុងចិត្ត ។ ដោយសារផ្ទះមួយនេះនៅឆ្ងាយដាច់ពីគេ ម្យ៉ាងពេលយប់អធ្រាត្រផងនោះគ្មានចាស់ទុំឯណាមកជួយមើលទេ គឺមានតែប្ដីរបស់នាងរត់ទៅដាំទឹកក្ដៅផង ទឹកត្រជាក់ផង ឡើងចុះៗ ។ ក្រៅតែពីប្តីរបស់នាង ឃើញមានក្មួយប្រុសវ័យជំទង់ម្នាក់តែប៉ុណ្ណោះ ដែលនៅជួយរុញឧសដាំទឹកក្តៅនៅក្រោមផ្ទះ ។

​ខ្ញុំបានហៅប្ដីរបស់នាងឱ្យឡើងទៅលើផ្ទះបន្ទាប់ពីនាងឈឺពោះកាន់តែខ្លាំង ។ ខ្ញុំចាប់ផ្តើមកាយពោះនាងមកក្រោមថ្នមៗ ដោយអនុវត្តតាមវិធីសាស្រ្តឆ្មបខ្មែរដែលចេះតៗគ្នាតាំងពីបុរាណមក ។ អ្វីដែលខ្ញុំបានមើលឃើញបន្ទាប់ពីនាងស្រែកខ្លាំង គឺភ្នែករបស់នាងបើកធំៗស្ទើរលោតចេញមកខាងក្រៅ សក់បះសំពោងឡើងមើលទៅគួរឱ្យខ្លាច ។ ចំណែកប្តីរបស់នាងភ័យស្លន់ស្លោពេកដល់ថ្នាក់ រកកាន់អ្វីមិនជាប់នឹងដៃ ព្រោះឃើញអាការៈរបស់នាងហាក់ប្លែកខុស ពីធម្មតា ។ ខ្ញុំបានប្រាប់ប្ដីរបស់នាងឱ្យទៅរកលោកអាចារ្យម្នាក់ នៅកណ្តាលភូមិល្បីខាងមន្តអាគម ដើម្បីមកជួយសូត្រ

ប្រោះព្រំចងសីមា ក្រែងមានខ្មោចព្រាយបិសាចមកយាយីក្រោយពេលសម្រាលរួច ។ ប្តីរបស់នាងក៏ចុះទៅតាមលោកអាចារ្យរហ័សដូចចិត្ត ដោយទុកតែខ្ញុំនៅលើផ្ទះជាមួយនឹងនាងតែពីរនាក់ ។

​អ្វីដែលខ្ញុំនឹកស្មានមិនដល់ គ្រាន់តែប្តីរបស់នាងចុះបាត់ពីលើផ្ទះភ្លាម ស្រាប់តែមានភ្លើងអ្វីម្យ៉ាងហោះចូលមកក្នុងផ្ទះវឹប ស្ទើរលត់ពន្លឺចង្កៀងប្រេងកាត ។ ​ពន្លឺរបស់វាសាចពន្លឺចាំងភ្នែកខ្ញុំពេញទំហឹងធ្វើឱ្យមើលអ្វីមិនឃើញ ។ ខ្ញុំស្រាប់តែមានអារម្មណ៍ថាត្រជាក់ឆ្អឹងខ្នងស្រេបដល់ចុងជើង ។ ពេលនោះ ដៃរបស់នាងខំស្រវាតោងក្រមាដែលដាក់ចងនៅមាត់បង្អួច ដើម្បីប្រឹងឱ្យកូនឆាប់ចេញផុតមកក្រៅ ។ នាងខំស្រែកឡើងបែកញើសជោគថ្ងាស ជោគខ្លួន ហើយឈាមរបស់នាងហូរចេញមកច្រើនហួសពីអ្វីដែលខ្ញុំបានជួបសម្រាលពីមុនមក ។ ដោយក្តីបារម្ភពីសុវត្តិភាពរបស់នាង ខ្ញុំបានស្រែកហៅក្មួយប្រុសវ័យជំទង់ម្នាក់ ដែលកំពុងនៅដាំទឹកក្តៅខាងក្រោមនោះ ឱ្យឡើងមកលើផ្ទះដើម្បីបានជាគ្នា ។

​គាប់ជួនពេលនោះ មិនដឹងជាមានសម្លេងសត្វខ្លែងស្រាកមកពីណា ស្រែករំពងហើររេរាឆ្វែលឆ្វាត់ ក្បែរៗផ្ទះ នោះ ។ ចំពេលខែរនោចមេឃងងឹតស្លុបរកមើលអ្វីមិនឃើញផង កាន់តែធ្វើឱ្យខ្ញុំភ័យតក់ស្លុតភ្នែកនៅកញ្ចឹងក ។ ចំណែកឯ នៅកណ្ដាលភូមិឯណោះឮសម្លេងឆ្កែព្រូសផង លូផងឡើងគ្រលួច ឱ្យទ្រហឹងអឺងកង ។ សត្វខ្លែងស្រាកហើរពីទីឆ្ងាយមកទំលើដើមចំរៀកខាងត្បូងផ្ទះ ។ នាងនោះឈឺខ្លាំងពេក ស្រែកឡើងភ្លាត់សម្លេងដូរទៅជាសម្លេងផ្សេង មានលក្ខណៈដូចជាសម្លេងខ្មោចដែលកំពុងខឹងនរណាម្នាក់ ។ ខ្ញុំកំពុងទន្ទឹងរង់ចាំ ដោយមិនដឹងថាថ្មើរណាបានជាប្តីរបស់នាងនាំលោកអាចារ្យមកដល់ទេ ។ ខ្លែងស្រាក កាន់តែរំពងសម្លេងរបស់វាកញ្ជ្រោលខ្លាំងឡើងៗ ធ្វើឱ្យអារម្មណ៍ខ្ញុំវិលវល់រកធ្វើអ្វីលែងចេញ បានត្រឹមបើកភ្លែកសម្លឹងមើលមុខរបស់នាងដូចមនុស្សភាំងស្មារតី ។

​ខណៈនោះទឹកមុខនាងប្រែជាពណ៌ខ្មៅមួយរំពេច រីឯឈាមក៏ចេះតែហូររឹតតែច្រើនឡើងដល់ខ្សោះខ្លួន រហូតធ្វើឱ្យនាងទ្រាំលែងបានបញ្ឈរភ្នែកឡើងលើសស្លឺត ។ ខ្ញុំក៏ភ្ញាក់ខ្លួនក្រញាង នៅពេលឮមាត់ប្តីរបស់នាង និងលោកអាចារ្យឡើងមកដល់មាត់ទ្វារ ។ ប៉ុន្តែអ្វីៗត្រូវបានបញ្ចប់នៅមុននេះបន្តិច ព្រោះជាអកុសលនាងបានដាច់ខ្យល់ស្លាប់បាត់ទៅហើយ ។

ស្មេរ : នឹម នីបូណា

​